Kum 1986 khan National Policy on Education hi duan a ni a, chu chu kum 1992 khan siam danglam 

 

leh a ni. Hemi atang hian zirna kalphung ennawnna atan vawi engemawzat tihdanglam a ni a. Sorkar laipui chuan National Education Policy hi zirna tha, zirna tihdanglam leh zir zau zelna atan te, mipui mamawh lo danglam zel phuhru tur zawnga phurhchhuah hi a duh dan a ni a, zirlaite mamawh-thiamna leh hriatfiahna pek leh, Science, Technology, Academics leh Industry-a mihring indaih lohna tihbo hi a tum a ni a, India ram hi hriatna chungchuang neihtir a tum ber a ni. Sorkar laipuiin New Education Policy duan a tum mekah hian thupui thlanchhuah hmangin School Education Department, Mizoram hmalakna in mithiam bikten Consultation Meeting neia fuankhawmin hmalak mek zel a ni.

 

He programme bawhzuina kal zelah hian Dt 24.6.2015 (Nilaini) khan NERIE Shillong buatsaihin SCERT Auditorium-ah State Level Consultative Meeting on New Education Policy hi neih leh a ni a, heta tan hian Resource person turin NCERT, N.Delhi atangin Prof. Amarendra Behera leh NERIE Shillong atangin Dr.Melissa G.Wallang, Dr.Basansy Kherlukhi leh Prof. Subhash Chandra Roy te an lokal. He programme neihna ah hian Pi Manisha Saxena Commissioner & Secretary, School Education Department chu khuallian a ni a, Pu K.Lalthawmmawia I.A.S., Director School Education Department chuan programme a kaihhruai bawk. Chawhnu lam sawihona ah hian thupui hlawm lian tak tak 33 thlan chhuah a ni a, heng thupuite hi hlawm hnih - School Education atan 13, Higher Education atan 20-a then a ni. Vawiin hian School Education atana thupui thlanchhuah 13 zinga thupui 11 hmangin consultation hi neih a ni a, NERIE Shillong atanga mithiam lo kalten heng thupuite hi an sawihawn hnuah sawihona hi neih zui a ni, Consultation-ah hian IASE a mithiam thenkhat te, University leh College a thawk thenkhat te, School Education Directorate-a Deputy Director leh a chung lam te, District tina DEO leh SDEO zawng zawng te, SCERT-a officer te, RMSA leh SSA Officer te, DIETs hrang hranga Principal te, zirna lama Mizoram Education Department lo kaihruai tawhtu mithiam tak tak te leh Teacher Association hruaitute leh zirlai pawl hruaitute kokim takin an tel a, nilengin hun hman a ni. 

 

Hemi atana hmalakna pakhat chu June 18, 2015 khan Art & Culture Auditorium Berawtlang-ah District tina School Education Officers ho kokhawmin School Education Minister hovin New Education Policy chungchangah hian Consultation meeting neih a ni tawh bawk.