SCERT chuan 25^th January, 2024 chawhnu dar 1 khan Incentive Cash Award for Proficiency in Science and Mathematics an hmang a, Dr. Vanlalthlana, Hon’ble Minister of School Education leh Dr. Lalzirmawia Chhangte, IAS, Secretary, School Education Department ten an hmanpui. He programme hi Pi Zohmingliani, Director, SCERT in kaihruaiin HSLC leh HSSLC a Science leh Mathematics subject-a top-3 te hnenah lawmpuina sumfai leh memento hlan an ni. HSLC-ah hian Science subject-ah zirlai 38 leh Mathematics-ah zirlai 25 ten he award hi an dawng a, HSSLC- ah Mathematics, Physics, Chemistry leh Biology-a ti tha zirlai 18 ten he cash award hi an dawng bawk. 

            He Incentive Cash Award for Proficiency in Science and Mathematics hi Science Promotion Wing (SPW), SCERT bul tum niin, kum 1978 atang khan Prof. L.N Tluanga kaihhruaina-a bul tan a ni a, kum tin zirlai tithate hnenah pek thin a lo ni ta a, kumin hi vawi 46 an semna a ni tawh a ni. Science Promotion Wing, SCERT hi kum 1973 khan Mizoram a Science leh Mathematics-in hma a sawn nana din a ni. 

            He cash award semna inkhawmah hian Dr. Lalzirmawia Chhangte, IAS chuan ‘hetiang hun pawimawh tak awm theih chhan chu zirlaite, zirtirtute leh nu leh pate tanrualna leh an thawhrim rah a ni’ a ti a, inelna sang tak khawvela cheng kan ni a, mi naran tan hna tha hmuh a har chho zel dawn a, mi naran ni lo, mi thiam tak tak ni tura in vawrh chhoh hi a pawimawh a ni tiin zirlaite a fuih.

            He programme-a khuallian Dr. Vanlalthlana, Minister, School Education chuan, kan naupangte hi khawvel a hawi ruala hawi ve thei tura kan buatsaih a ngai a, Technology a thang chho a, chuvang chuan zirtirtute bakah SCERT-a hnathawkte pawh inbuatsaih a tul thu a sawi. Kan sorkar hian zirlai matric zo hlim te tuaihriamna turin UPSC grooming buatsaih a tum a, competitive exam lama hmasawntir kan tum hle a ni a ti. Thiamna lama khawvel hmasawn ruala inthlak danglam ngam zel turin zirlaite a fuih a. Khawtlang leh kohhran-a inhman dan chin tawk hre turin a chah bawk. Zirlai kalkhawmte chu nakin lawka ram hruaitu leh researcher pawimawh tak an la nih ngei a rin thu a sawi a, Mizoramin engnge harsatna kan neih hriatchhuah tum tur leh, chu harsatna sutkianna tur ‘affordable, sustainable solution’ ngaihven a, hma la ngei turin a chah.