December ni 3, 2024 (Thawhlehni) khan Chanmari YMA Hall-ah Directorate of SCERT buatsaihin Aizawl khawpui chhunga Sawrkar enkawl High School te pualin Career Awareness Campaign buatsaih a ni a, Dr. Vanlalthlana, Hon’ble Minister of School Education chuan hmanpuiin, Resource Person – Pu Lalhriatzuala, Chiko Coaching Centre leh Pu Lalhruaitluanga, Zo Career Solution te leh SCERT aṭangin Pi Florence Lalrinpuii, Deputy Director (VSE) leh Pi Lalrindiki, Lecturer (VSE) te’n  zirlai kalkhawm te hnenah eizawnna chungchang zirtirna an pe a ni.

Programme khuhhawnna hi Pi Caroline Zoramthangi, Director, SCERT chuan kaihhruaiin, kalkhawm te lawmna thu a sawiin Educational and Vocational Guidance and Counselling Cell, SCERT hmalakna report tawi a pe a. Programme buatsaih anih chhan leh District hrang hranga kalpui a nih dan te, zirlai ten an hlawkpui tawh dan te a sawi a. SCERT office-ah Career Counselling mamawh te tan engtik lai pawhin mithiam rawn tur an awm thu sawiin zirlaite chu hmang ṭangkai turin a sawm bawk. Vocational Guidance hian Employable Skill development lam a dah pawimawh hle a, hei hi NEP 2020 pawhin a ngai pawimawh em em a, SCERT pawhin a tih hlawhtlin nan theihtawp a chhuah mek thu a sawi.

Khuallian, Dr. Vanlalthlana, Hon’ble Minister of School Education chuan zirlai kalkhawmte fuihna thu sawiin zirlai te chu Sawrkar hna chauh hi ‘Hna’ a nih loh zia hrechiang tura a duh thu a sawi a. Mahni thiamthil hmanga mahni kea ding tur leh eizawnna tlak tura an thiamna te tuaihriam turin a fuih a. Eng hna pawh thawk dawn se, lehkha zir ṭhat a ngaih thu leh mahni kea ding tur pawhin taima taka lehkha zir a ngai a. Huaisen taka mahni tuina zawngah na taka kal tur te, eizawnna tlak ngei tuipui tur te in a chah bawk. Tunlai khawvel thiamna sang zelah eizawng rual an nih meuh chuan AI (Artificial Intelligence) nen hna an inchuh tawh dawn a, chuvangin AI chhawr ṭangkai thiam tur leh Skill development ngai pawimawh tur te, eizawnna tur kawng an zawnna kawngah eng nge kan ramin a mamawh, a market a ṭha em, tih te ngaihven a Gap zawng thiam tur te in a fuih a. Tin, eng eizawnnaah pawh Pathian Ṭih a pawimawh zia sawi bawk.

Khuallian in thu a sawi zawh hian Pi Zoramthangi Ralte, Joint Director, SCERT chuan lawmthu sawiin Career Awareness campaign khuhhawnna programme a khar a, Resource Person te’n  zirtirna hun an hmang chhunzawm nghal a ni.

Educational and Vocational Guidance and Counselling Cell, SCERT hi kum 1981-a  din a ni a. He Cell hmalakna hian Career Awareness Campaign hi Aizawl district mai bakah Mizoram khaw hrang hrangah te kum eng emaw zat kalpui a lo ni tawh ṭhin a. Zirlaiten eizawnna tur leh zirna an kalpui zel dan turah ruahmanna siam dan te, mizia leh tui zawng mila subject stream thlan thiam te, mahni kea ding thei tura kawng zawh tur thlan nana ruahmanna siam dan te leh eizawnna kawnga hlawhtling tura thil pawimawh hrang hrang te bakah Vocational education leh skill training chungchangte zirlaite hrilhhriat hi he Career Awareness Campaign in a tum ber a ni. 

Educational and Vocational Guidance and Counselling Cell, SCERT ah hian High School leh Higher Secondary School zirlaite tan Career Counselling kalpui a ni a, mimal leh school ang pawhin office hun chhungin a ngaihven theih reng a ni. Tin, a remchan dan angin kum tin Career Exhibition buatsaih a ni a, zirlai te’n eizawnna kawng hrang hrang entirna hun hmangin hun hlawk thlak tak hman a ni ṭhin bawk. He’ng bakah hian sawrkar enkawl sikul hrang hranga zirtirtu te pual 6 Months Certificate Course in Guidance and Counselling kalpui mek niin, batch 3 laiin an zirchhuak tawh a. Zirlaite’n he Certificate Course an hlawkpui dan zirchianna research project pawh peihfel thuai tura hmalak mek a ni.