Directorate of SCERT, Mizoram buatsaihin ni 4 awh tur Workshop to Contextualise & Revise Elementary School Textbook for the Academic Session of 2026 – 2027 chu vawiin ni 10 June, 2025 (Thawhlehni) chawhma dar 10:30 khan SCERT, Auditorium, Chaltlangah ṭan a ni. 

 

Workshop ṭanna inkhawm hi Pi Zoramthangi Ralte, Joint Director-in a kaihruai a, subject hrang hrang textbook committee member kal khawmte lawmna thu a sawia. Dr. Lalduhawmi Thomte, Joint Director, SCERT-in workshop kalpui dan tur leh buatsaih chhante a sawifiah a. Pi Caroline Zoramthangi Director, SCERT- chuan Workshop hawnna thu sawiin  “21st Century a Education Policy kan neih hmasak ber chu NEP 2020 a ni a, chumi hrin chhuah pawimawh tak chu National Curriculum Framework 2023 a nih thu leh  NCF 2023 chuan Curriculum leh Syllabus thar a hring ve leh  a, Mizoram state chuan Curriculum leh Syllabus milin nakum academic session 2026-27 atanga hman tan tur Texbooks thar kan buatsaih a lo ngai ta a ni” a ti.

Director chuan, “kan Textbook thar buatsaih tura min kaihruaitu tur (Guiding principles) chu Curricular goals, Competencies leh learning outcomes a la ni reng dawn a, NCERT textbooks kan hman avangin a paih ngai kan tih te, a belh ngai kan tih te en chung zelin, kan state mil, kan culture mil Texbook tha tak kan siam chhuah ngei ka beisei a ti. Tin, he Textbook buatsaih tura mithiam lo kal khawmte hnenah chuan Mihring hmantlak engtin nge kan zirlaibu hmang hian kan siam ang ? tih leh Thiamna tak tak chu kan thil hriat leh zirna awmze nei a hman anih thu sawiin an thiamna te thahnemngai taka ram tana hmang turin a sawm a ni.

 

SCERT Mizoram chuan NCERT textbook tharte hi Mizoram mila siam rem (contextualisation and adaptation) phalna fel fai tak aneih thusawiin, tun ṭumah hian  pawl 1, pawl 2, pawl 3 leh pawl 6 zirlaibute chu siam rema, kum 2026-2027 aṭanga hman ṭan tur a ni a. Mizo leh Hindi subject bik erawh chu textbook hmanlai te ennawnin, NEP 2020 leh NCF-SE 2023 zulzuia dah belh ngai leh siam rem ngaite siam rem tura buatsaih anih thu a sawi tel bawk. 

 

He workshop-ah hian sikul subject hrang hrang – English, Hindi, Mizo, Social Science, Environmental Studies, Mathematics leh Science Textbook Committee-te an kal kim ṭha hle a.  Subject Committee hrang hrang atan hian Sikul, College, University leh Education department-a thawkte ruat an ni.