Science Promotion Wing, SCERT chuan Science leh Mathematics zirna tih hmasawnna leh chawi nun nan kum tinin Science Seminar hi thupui thlan bik hmangin a buatsaih thin a. Seminar hi class VIII - X naupang te tana buatsaih thin a ni. 

He Student Science Seminar hi SCERT, Mizoram leh National Council of Science Museum, Ministry of Culture, Govt. of India tangkawpin a buatsaih a ni a. Kuminah hian khawvel hmasawnna in a ken tel pawimawh tak ‘Artificial Intelligence: Potentials and Concerns’ tih chu Seminar thupui atan hman a ni.

Science Seminar hi District Education Officer (DEO) te kaihhruaina in District Level-ah neih a ni a. Hnahthial District tih loh chu an tel thei vek a ni. District level-a ti tha ber te hian State Level-ah intihsiakna an neih leh thin a ni. 

43^rd State Level Science Seminar hi ni 12 September, 2024-ah SCERT Auditorium-ah neih a ni a. He Seminar-ah hian Khuallian Pi Zohmingliani, Director, SCERT chuan thu sawiin, National Education Policy, (NEP 2020) in zirna tih hmasawn nan Science & Technology thiamna hman tangkai a tul zia uar takin a sawi a, Artificial Intelligence leh Coding te hi class VI atang chuan curicullum-a awm tel turin ruahmanna a siam tawh a, hetiang thupui pawimawh hmanga Seminar buatsaih a ni hi lawmawm a tih thu a sawi. 43^rd State Level Science Seminar hi Pi Caroline Zoramthangi, Joint Director, SCERT in a kaihruai a, Seminar report kimchang hi Pu F. Lalliansanga, Deputy Director(SPW), SCERT chuan a pe a, Science Seminar hi kum 1979 atang neih tan a nih thu sawiin, Science  leh Mathematics a hmasawnna a awm theih nan leh zirtirtu leh naupang ten an thiamna leh thiehna an phochhuah theihna hun remchang siam hi a thil tum pawimawh tak pakhat a ni a ti a, Seminar thupui atana Artificial Intelligence thlan a nih dan te leh endik dan kalphung te a sawi lang bawk. 

Science Seminar hi kaihhruaina mumal tak hnuaiah endik niin, a endiktue hi Mizorama kan mithiam neih te zing a mi an ni. Kan Jury te chu - 

Prof. Lalhriatzuala, Head, Department of Physics, PU College

Mr H. Thangkhanhau, Assistant Professor, Department of Computer Science, Govt Zirtiri Residential Sc. College

Pu P.C. Lalrintluanga, Science Consultant, SCERT, Mizoram

43^rd State Level Science Seminar lawmman dawng tu te chu:

1^st: Grace MS Dawngzeli  School: St Johns HSS, Kolasib

2^nd: Vanrohlui Pachuau   School: St Pauls HSS, Aizawl

3^rd: Fibi Ramdinsangi School: PES, Khawzawl Vengthar Pastorate, Khawzawl

Vawiin a State level Science Seminar a ti tha ber Grace MS Dawngzeli St Johns HSS, Kolasib hian Mizoram ai awhin National Science Seminar 2024, ni 20 November, 2024-a National Science Centre, Mumbai a neih turah State ai a awh ang.

National a pakhatna hian lawmman chi hrang hrang bakah thla tin scholarship Rs 4000 kum khat chhung a dawng ang a, Special Prize (mi 9 hnaenah) thla tin scholarship Rs 2000 kum khat chhung a dawng bawk ang.