Ni 9th November, 2022 khan  School Education Minister Pu Lalchhandama Ralte chuan SCERT Auditorium-ah SCERT buatsaih Science leh Mathematics-a tițhate chawimawina a hmanpui.

 

     Minister chuan he hunah hian thusawiin zirlai tițha lawmman dawngte chu an thiamna leh theihna ram tana hmang țangkai ngei turin a fuih a. Mizoram UT kan nih laiin Assembly session hialin zirlaite chu Science leh Mathematics thiam tura cho chuahna tur zirlai tițhate chawimawina an lo duang chu a hlawhtlinna hmuh tur a tam ta hle a ni a ti a. UT hun laia High School-a Science leh Mathematics zirtirtu-a Mizo awm mang lo kha tunah chuan lak sen loh an lo awm ta a ni a ti. Sorkarin zirna kawnga hma a laknaah  Zirlaibute hi Mizo zirlaiten mahni țawng ngeia an thiam theih nan Bilingual textbook a  siam a ni a, peih fel țep a ni a, class IX leh X zirlaibu ațangin bul țan a ni dawn a ni a ti bawk. 

 

Minister chuan kumina lawmman dawngte chu Zoram hmun hrang hrang ațanga lo kalkhawm an ni a, hei hian tlang hrang hranga zirtirtuten lawmman hmu tur hi an chher chhuak thei a, zirlaite pawhin an tlin vek tih a lantir a ni a ti a. Tuna hmun hrang hranga zirlaite chu he incentive cash award dawng thei an ni tih hriaa țan la turin a fuih bawk.


       Dr Lalzirmawia Chhangte Secretary School Education Department chuan he hunah hian Science Laboratory mannual a tlangzarh a, thusawiin zirlai lawmman dawngte chu chhuanawm a tih thu a sawi a. Secretary chuan tunlai naupangte hian zir ngai lova thiam tura inngaihna an nei lian a, thil tam tak hi an thiam mai bawk a,  hei hi chawhthawh thiam a tul a, competition rilru lo tlahniam ta pawh hi chawisan vat a ngai a, mitinin darkar 24 kan neih chu midangte thiam ang thiam nan hman țangkai a pawimawh a ni a ti bawk.


      Incentive cash award for proficiency in Science &  Mathematics hi kum 1978 ațang khan sem a ni a, kumin hi vawi  45-na a ni a, kuminah hian mi 86 in lawmman hi an dawng a, HSLC ațangin mi 66 leh HSSLC ațangin  mi 20 in an dawng a ni. Science leh Mathematics a tițha chawimawina dawngte hi pakhatna lawmman dawngten full mark 100 an hmu a, pahnihna dawngten mark 99, pathumna dawngten mark 98 an hmu a ni.

  He chawimawina hunah  hian School Education, SCERT, MBSE leh Samagra Shiksha officer te, lawmman dawng school Principal, Headmaster te leh zirlaite leh an nu leh pa te an kalkhawm a ni.