Ni 1 October, 2026 hian SCERT, Mizoram buatsaihin‘45th State Level Students’ Science Seminar’leh‘SAfES Portal’tlangzarhna hun chu School Education Minister, Dr. Vanlalthlana hovin SCERT Auditorium-ah neih a ni a. Kumin Seminar thupui chu ‘Indian Energy Basket 2047: Prospects and Challenges’ a ni.
Khuallian Dr. Vanlalthlana, School Education Minister chuan zirlaite hnenah fuihna thu sawiin, ‘blind faith’ kalsan a, scientific enquiry neiturin a chah a. Rin thu mai maia thil sawi lovin, scientific temper neia, thil nihna dik tak pho lang zawk ṭhin turin a ngen a. Education Minister chuan SAfES Portal a hawn rual hian, hemi hmanga hmalakna thenkhat a tarlang a. A thawktu SCERT chungah lawmthu a sawiin, SAfES hmanga Mizoramin bung thar a kai ngei a beisei thu a sawi bawk a ni.
Science Seminar leh SAfES Portal tlangzarhna hun hi Pi Caroline Zoramthangi, SCERT Director chuan a kaihruai a. Pu F. Lalliansanga, Deputy Director, SCERT-in Science Seminar chungchang report pein, Pu PC Lalrintluanga, Science Consultant hnen aṭangin SAfES Portal chungchang report ngaihthlak a ni a. Science Seminar-a Judge-te zing aṭangin Seminar hmanga intihsiakna an endik dan leh zirlaite fuihna thurawn ngaihthlak a ni a, Pi Zoramthangi Ralte, Joint Director-in lawmthu sawin hun a hmang a ni.
State Level Students’ Science Seminar-ah hian Judge atan (i) Dr. PC Lalngilneia, Senior Scientific Officer, MISTIC, Department of Science & Technology, (ii) Dr. K. Vanlaldinpuia, Asst. Professor, Department of Chemistry, Pachhunga University College leh (iii) Pu PC Lalrintluanga, Science Consultant, SCERT-te an ṭhu a ni.
Science Promotion Wing, SCERT hian Science zirna tihhmasawn nan leh chawi nun nan Science Exhibition, Science Drama Competition, Incentive Cash Awards, Training, Laboratory/equipment sem leh a dangte hmangin hma a la ṭhin a. State Level Students’ Science Seminar pawh hi kum 1979 aṭang khan kum tin District level-ah leh State level-ah te buatsaih ṭhin a ni.
Mizorama District pakua (9)-a neih, District Level Science Seminar-a pakhatna ṭheuhte chu an district aiawhin he Seminar-ah hian an tel a. State Level-a pakhatna hi Mizoram aiawhin ni 30 October, 2026-ah National Science Seminar, National Science Centre, Pragati Maidan, New Delhi-a neih turah a tel dawn a ni.
Vawiina State Level Students’ Science Seminar-a tiṭha pathumte chu:
- Pakhatna: TBC Vanlalzawmi, Marian HS, Serchhip
- Pahnihna: Thelma Z. Nghoneiza, Maraland Academy, Siaha
- Pathumna: Rinchungnungi, Govt. GM HS, Champhai
He programme-ah hian Dr. Vanlalthlana, School Education Minister chuan ‘SAfES Portal’ a tlangzarh bawk a. Standardized Assessment for Elementary Schools (SAfES) hi Mizoram-a elementary education tihhmasawnna tura School Education Minister Dr. Vanlalthlana hmalakna pawimawh tak niin State Council of Educational Research and Training (SCERT), Mizoramin a kalpui mek a ni. He assessment hian Government School, Deficit School leh Grant-in-Aid (GIA) school-te a huam a, NEP 2020 leh NCF-SE-in a tarlan kalphungte nena inrem tura buatsaih a ni.
Kum 2025-26 khan SAfES hi Pawl V leh Pawl VIII tan kalpui a lo ni tawh a. Harsatna lo hmachhawn tawhte sut kian nan Directorate of SCERT chuan Web Portal a siam thar a ni. He portal hmang hian school leh zirlaite assessment data lakkhawm, finfiah leh endik chu awlsam zawkin kalpui theih a ni dawn a. Tin, SAfES thuchhuah leh hriattirna pawimawhte pawh portal hmangin school-te hnenah semdarh theih tura duan a ni.
SAfES 2027 hi elementary education-a stage pawimawh pathum – Pawl IV, V leh VIII-ahte conduct a ni ang a, Third Term Examination-ah common questions hmangin SAfES hi conduct tur a ni.
