Ni 7 August khan Saikuti Hall, Lungleiah Directorate of SCERT huaihawtin Lunglei khawpui chhunga sawrkar enkawl high school zirlaite pualin, hma hun atana kawng inkawhhmuhna leh nun dan ṭha inzirtirna, 'Career Awareness & Life Skills Education Programme' buatsaih a ni a. Lunglei West bialtu MLA Pu T. Lalhlimpuia chuan khuallian niin a hmanpui.

Khuallian Pu T. Lalhlimpuia chuan mi chhawr tlak ni turin zirlaibua mi zir thiam ringawt a tawk lo va, thiam thil bik neih bakah, nun hmachhawn thiam a ṭul, a ti a. Nu leh pa leh zirlai tam tak rilruah thlan tlak ngai lova thawh theih chauh hnaa ngaihna a awm tih sawiin, mistiri thiam leh puan ṭhui thiam mamawhna a pung deuh deuh va, kut hna thawh hmanga hlawhtlin theihna tam tak a awm tih a sawi a. Computer thiam, hotu nih thiam, hun vawn dik leh mi dang nena nun ho thiam te a pawimawh thu sawiin, internet-a zir tur tam tak awm chu a ṭangkai zawnga hmang turin zirlaite a chah a. Tihtauh hma lutuk chu hun remchang tam tak bawhpelh theihna a nih avangin tihtauh ching lo tur te, hautak lova nun zir tur leh vanneihna van tla dawn beisei lo va, a hlawha hlawh chhuah tum tur te'n a chah a. Mut hun leh thawh hun hria a, mahni inhai kaw thei tura inrin tawkna nei tur leh mite'n an mamawh loh theih loh tura thiam thil eng emaw tal neih tum turin zirlaite chu a chah.

Lunglei District Education Officer Pu Micky R. Lalenkawla'n hun a kaihruai a. SCERT Joint Director Dr Lalduhawmi Thomte chuan SCERT hnuaia Educational and Vocational Guidance and Counselling Cell (EVGCC) hma lakna hrang hrang a tar lang a. 'Kum zabi 21-na thiam thil' an tih mai, Sapṭawnga '4Cs in Education' an tih - 'Communication, Collaboration, Creativity & Critical Thinking' (mi dang dawr thiam, mi dang thawhpui thiam, thil thar ngaihtuah thiam leh thil chik peih' chu eng kawngah pawh hlawhtling tura a pawimawh thu leh National Education Policy 2020-in zirlaitea tuh a tum a nih thu a sawi.

Lunglei District Institute of Education & Training (DIET) Principal Pi Lalremruati Fanai chuan lawm thu a sawi a. SCERT aṭangin Lecturer Pi Lalrindiki leh Assistant Special Education Officer Pi Esther Lalnunpuii te'n zirlaite'n eizawnna kawng an zawhna tura an hriat tur pawimawh leh an ni tin nun kawng kaihruai thei tur thu ṭha tak tak an zirtir a. Zawhna leh chhanna hun hman a ni bawk.

He hunah hian Lunglei khawpui chhunga high school 6 aṭangin zirlai 617 leh zirtirtute an tel a. School telte chu:

1. Govt HS, Lunglei - 307

2. Govt Bazar HS - 63
3. Govt Venglai HS - 41
4. Govt Rahsiveng HS - 33
5. Govt Leitlangpui HS - 81
6. Govt Electric HS - 92


State Council of Educational Research and Training (SCERT) hi kum 1980 January ni 20 khan din a ni a. Sikul zirlaibu leh zir tur an ruahman bakah, zirna peng hrang hrang tihhmasawn kawngah leh zirtirtute zirtir leh kaihhruai kawngah te, zir bingna leh zir chianna lamah te hma an la ṭhin bawk.


SCERT hnuaia Educational and Vocational Guidance and Counselling Cell hi kum 1981-a din a ni a. He Cell hma lakna hian Mizoram khaw hrang hrangah career awareness programme kalpui ṭhin niin, zirlaite'n eizawnna tur leh zirna an kalpui zel dan turah ruahmanna siam dan te, mizia leh tui zawng mila subject stream thlan dan tur te, mahni kea ding thei tura kawng zawh tur thlan nana ruahmanna siam dan te leh eizawnna kawnga hlawhtling tura thil pawimawh hrang hrangte bakah, kut them thiamna lam chungchangte zirlaite an zirtir ṭhin.


EVGCC-ah hian high school leh higher secondary school zirlaite tan career counselling kalpui ṭhin niin, mimal leh school ang pawhin office hun chhungin ngaihven theih reng a ni a. A remchan danin kum tin career exhibition buatsaihin, zirlaite'n eizawnna kawng hrang hrang entirna nen hlawk taka hun hman ṭhin a ni a. Sawrkar enkawl sikul hrang hranga zirtirtute pualin '6-Month Certificate Course in Guidance and Counselling' kalpui ṭhin niin, batch 3-in an zir chhuak tawh a. Zirlaite'n he Certificate Course an hlawkpui dan zir chianna research project pawh peih fel tawh niin, tlangzarh tura buaipui mek a ni.