Ni 22 January, 2026 khan State Council of Educational Research and Training (SCERT), Science Promotion Wing buatsaihin MBSE hnuaia HSLC leh HSSLC examination-a Science leh Mathematics Subject-a zirlai titha lawmman semna ‘48th Incentive Cash Award for Proficiency in Science & Mathematics, 2024 – 2025’ chu Vanapa Hall-ah neih a ni a. He hun hi Education Minister Dr. Vanlalthlana chuan Khuallian niin a hmanpui.
Kumin hian kum danga tih loh ang deuhin 1st Session leh 2nd Session awmin chawhma lamah hian zirlaite’n hlawk zawha Mathematics & Science hriatthiam an neih theih nan hun hman a ni a. Professor J. Lalvohbika, Department Mathematics, PUC chuan "Driving Passion for Mathematics" tih thupui hmangin, Mathematics Subject lama zirlaite tuina thar an neih theihna tur Presentation a pe a. Pu Lalngilneia, Sr. Scientific Officer, MISTIC, Deptt. of Science & Technology chuan ‘Artificial Intelligence and Data Science’ tih thupui hmangin tunlai thiam tangkaina leh fimkhurna turte sawi zauna hun a hmang a ni. 1st Session hi Pi Zoramthangi Jt. Director, SCERT chuan a kaihruai a ni.
2nd Session hi Pi Caroline Zoramthangi, Director, SCERT chuan kaihruaiin Pu F. Lalliansanga, Deputy Director (SPW), SCERT hnen atangin Technical Report ngaihthlak a ni a, Education Minister Dr. Vanlalthlana hian 48th Incentive Cash Award for Proficiency in Science & Mathematics lawmman a sem nghal bawk a ni.
He hunah hian khuallian Dr. Vanlalthlana chuan thu sawiin, Science leh Mathematics chu subject pawimawh tak an nih thu leh khawvel thiamna thang zelah mamawhna a san zel thu a sawi a. Mizoram chhungah heng Subject-a tui mi leh taima taka zir thin an awm chu lawmawm a tih thu sawiin, hun lo kal zel turah pawh zirlai tam zawkin Science leh Mathematics Subject-ah tuina an lo chhar zel a beisei thu a sawi a. Zirna tha zawk kalpui a nih zel theih nan Sawrkar chuan zirchianna leh ruahmanna tha a neih zel tur thu a sawi sawiin Zirlai te mai bakah Zirtirtute an pawimawh thu a sawi a, Subject Teacher te ngei Training kal that a pawimawh thu leh Zirtirtu te training an PAR-ah reflect a nih tur thu a sawi a, tin, Education Examination Reforms atangin Quality Education siam tum anih thu sawiin Class V, VIII mai bakah nakum atang chuan Class IX pawhin common questions (SAfES) an chhang tawh dawn tih thu a sawi bawk.
Education Minister chuan hlawhtling tur chuan taimakna a pawimawh thu a sawi a. Khawvel hriata mi ropui leh hlawhtlinna changtute hi vawi tam tak hlawhchham chunga beidawng duh lote an nih thu sawiin, hlawhchhamna karah pawh beidawng mai lo a; tang fan fan turin he huna kalkhawmte a fuih a ni.
Science Promotion Wing (SPW), SCERT hi kum 1973 khan School Education Department hnuaiah din a ni a. Kum 1978 khan Incentive Cash Award for Proficiency in Science & Mathematics hi Mizoram a Science & Mathematics zirna in hma a sawn zel theih nana duan chhuah niin; Assembly House-ah Legislate a lo ni tawh a. Kumtin neih chhunzawm zel niin; 48th Incentive Cash Award for Proficiency in Science & Mathematics, 2024 - 2025 a lawmman dawng thei turte chu HSSLC leh HSLC Mizoram Board of School Education-in a buatsaih Examination Result Top 3 –te a an ni a. HSLC-ah Science Subject-ah zirlai 25 leh Mathematics Subject-ah zirlai 15 te’n lawmman an la a. HSSLC ah Mathematics Subject-ah zirlai 3, Physics Subject-ah zirlai 7, Chemistry Subject-ah zirlai 4 leh Biology Subject-ah zirlai 5 te lawmman lain, 48th Incentive Cash Award for Proficiency in Science & Mathematics, 2024 – 2025 ah hian zirlai 59 ten lawmman an la a ni. He hunah hian Director, School Education leh Mizoram Board of School Education Department (MBSE) hotute leh Official hrang hrang sawm te an tel bawk a ni.
Zirlai lawmman late list leh lamman lak lai thlalak te hi a hnuaiah hian download theihin attach a ni e.
