Vawiin 3.6.2020 chhun dar 12 khan School Education Minister Pu Lalchhandama Ralte hovin a Office Chamber-ah School Academic Session tan hun tur sawiho a ni a, July 15, 2020-ah School session 2020-21 tan ni se, tih rel a ni. June 22,2020-ah Class XI tan Admission hawn nise tih rel a ni bawk.

School luh tan hun tura ruat July 15,2020 ah hi chuan quarantine-na atana hman school building-te pawh tih ruaha naupang kalna tlaka tihthianghlim hman beisei a ni tih sawi lan a ni a. Minister hova meeting-ah hian tun academic session hi session kal lai April 2020-March 2021 chhunga zawh fel hman tura ruahmanna siam nise, school calendar thar pawh duan nise, tih a ni a. Ram dinhmun enin naupang te lam luh hun tur chu a tul anih chuan ngaihtuah that leh theih tura dah a ni.

Meeting-ah hian School luh theih hun chu tlai deuh tawh mahse, elementary te tan sessional work plan siam a ni a, zir chhuah tur a awm sa vek bawk a, zirlai chapter pakhat mah paih lovin kalpui theih beisei a ni tih report a ni a, chapter khat zir chhung chu a hma aia rei lo deuh an zir ang a, exercise te pawh an titlem deuh mai dawn niin sawi a ni. Secondary zir tur chin pawh ruahmanna siam lawk vek anih thu report a ni a, Higher Secondary tan erawh chuan NEET/JEE exam la hmachhawn leh tur annih avangin CBSE kalpui dan enin ruahmanna siam a tul thu sawi a ni bawk.

Meeting-ah hian Higher Secondary School Exam la zawh fel loh paper thenkhat exam hun atan June 16,17,18 ruat anih thu te, zirlaiten mahni exam-na centre-ah theuh an exam tur thu leh centre tinah thermal screening tih anih tur thu te report a ni a, July 15 hmain HSSLC examination result hi tihchhuah hman a tul thu te, HSLC Compartmental Exam pawh June 16 ah neih anih tur thu report a ni.

Minister chuan Central Board of School Education (CBSE) leh Council for the Indian School Certificate Examination (CISCE) ten July thlaa Class X leh XII exam an neih hunah Mizorama rawn haw tawh Mizo zirlai 100 bawr velte tan HRD Minister leh Chief Executive & Secretary CISCE hnenah Aizawl-a an exam chhunzawm theih nan lehkha a ziak tih a sawi a. A hmalakna hian rah duhawm tak chhuahin Chief Executive & Secretary CISCE chuan chhanna a rawn thawn a, CBSE exam pawh mahni home state theuha exam theih turin thu chhuah a ni tih a sawi. Minister chuan CISCE exam centre atan hian Govt Mizo High School chu thlan a ni a, Officer incharge-ah Pi Lalrinpuii Under Secretary chu ruat a ni a, Exam Superintendent atan Pu Hmingchungnunga Headmaster Govt. Mizo HS chu ruat a ni tih a sawi bawk.

School Education Minister hova Meeting-ah hian HRD Board Vice Chairman Pu Lalthangmawia, Commissioner & Secretary Pi Esther Lalruatkimi, MBSE, SCERT, School Education Directorate officer-te, FMGST hruaitute, Central YMA, MZP, MSU, Independent School Owner Association hruaitute an tel a ni.