15th May, 2026 khan Mizorama district zawng zawnga sikul thlan bik 118-ah Foundational Learning Study (FLS) 2025-2026 neih a ni. He large-scale, system-level assessment hi national level-ah chuan PARAKH, NCERT-in kengkawhin, State leh UT level-ah SCERT, DIET leh Samagra Shiksha ten an kengkawh a ni.
FOUNDATIONAL LEARNING STUDY (FLS), 2026 hi Mizoram district tina thlan bik sikul 118-a Pawl 4 zirlai sikul naupang 1214 ten an chhang a ni. Sikul thlan bik 118 zingah hian English-medium sikul 60 leh Mizo-medium sikul 58 an tel. He Foundational Learning Study 2026 bei tur hian Rampum huapin state/ut 36 a district 776 atangin sikul 10,000 leh sikul naupang 1,00,000 te thlan an ni. Survey-ah hian Foundational Literacy (Mizo/English) leh Foundational Numeracy (Mathematics) ah Competency Based Question an chhang.
National Education Policy (NEP) 2020 chuan kum 2026 – 2027 hmain rampuma pawl 3 naupang zawng zawngten foundational literacy and numeracy a nei ngei tur a ni a ti a. He recommendation tihlawhtling tur hian Ministry of Education (MoE), Govt. of India chuan July, 2021-ah NIPUN Bharat Mission dinin a tihlawhtling tur leh kengkawh turin March, 2022 khan NCERT kutah a dah a.
Foundational Learning Study (FLS) hmasa ber chu 23 – 26 March, 2022 khan rampumah sikul 10,000 atangin Pawl 3 zirlai naupang 86,000 ten an lo chhang tawh a, sikul-te hi government sikul te, govt aided sikul te, private recognise sikul te leh central government sikul te a huam a ni. He Survey-ah hian Mizoram chuan Foundational Literacy-ah 59, Foundational Numeracy-ah 49 score in kumin survey-ah chuan hei aia score sang hi beisei a ni.
Foundational Learning Study hian a tum ber chu naupangin chhiar an thiam dan (oral reading fluency) chin leh nambar an thiam dan (numeracy skill) chin enfiah a ni a. FLS hmasa zawk, FLS 2022 kha baseline assessment angin paper leh pen (OMR-based) hmanga chhan tir an ni a, a tum hnihna FLS 2026 erawh hi chu digital platform-ah tablet hmanga chhan tir an ni thung a ni.
Foundational Learning Study 2026 result hi Performance Grading Index (PGI) 2.0 ah sengluh tur niin, State leh UT te Education-a an dinhmun leh rank teh nana hman a nih tawh dawn bawk avangin a pawimawh hle a ni.
Foundational Learning Study – 2026 hi National Level Trainer-cum-Observer Pi. Bobita Thakur, Samagra Shiksha, Himachal Pradesh leh Dr. Lalduhawmi Thomte, Joint Director, SCERT & State Level Coordinator for FLS – 2026 te kaihhruaina hnuaiah kal pui a ni.
