Aizawl, the 10th February, 2025: Prime Minister Shri Narendra Modi hova awmze nei zawka exam hmachhawn tura pawimawhte sawia titi hona, 'Pariksha Pe Charcha (PPC)' tum 8-na, Bharat Madapam, Pragati Maidan, New Delhi-a neih chu Mizoram atangin Governor Gen (Dr) Vijay Kumar Singh, PVSM, AVSM, YSM (Retd) hovin vawiin khan chhim a ni.
He program hi exam hmachhawn mai tur zirlaite bakah nu leh pa leh zirtirtute tana ruahman niin, kumin hi a tum 8-na niin, he hunah hian mi vaibelchhe 5 chuang tela chhut niin an tam ber tum a ni. Mizorama zirlaite, nu leh pate, zirtirtute leh School Education official-te pawhin he hun hi Governor hovin SCERT Auditorium & Conference Hall, Chaltlang atangin video conference kaltlangin an chhim a. Program zawh hnu hian Governor chuan zirlaite kawmin exam hmachhawn kawnga pawimawhte inpawhtlang takin a sawi pui a ni.
Hemi puala program tawi buatsaihah Governor Gen (Dr) Vijay Kumar Singh, PVSM, AVSM, YSM (Retd) chuan naupangtinte'n mahni pual danglamna an neih vek thu leh midang fate nena khaikhin vek a rem loh thu sawiin, zirlaite hrechiangtu nu leh pa leh zirtirtute chu exam hmachhawn kawnga zirlaite awmze nei zawka kaihruai turin a chah a. Exam pressure avanga harsatna thlengte'n tawrhna nasa zawk a thlen loh nan tanrual a tul tih sawiin, tha taka exam hmachhawn tur chuan rilru leh taksa hrisel mai bakah ei leh in chena uluk a ngai a ni, a ti a. Zirlaite chu hun vawng dik tur leh subject tinte tana ruahmanna tha siam tura chahin, nu leh pate pawh enpuia vilpui thin turin a chah a. Nu leh pa leh zirtirtute chu tawngkam dawnsawn leh hriat nuam zawk hmang hram hram thin turin a chah bawk.
Governor chuan exam-a mark hmuh zat chu thil pawimawh ber leh thutawp siamtu a nih vek bik loh thu sawiin, inrintawkna, thiamna tak tak leh nungchang tha neih chu nakin zel atana thil pawimawh tak a ni, a ti a. Zirlaite hmakhua ngaia Prime Minister hmalakna 'Pariksha Pe Charcha' chu chhuanawm a tih thu sawiin, zirlaite chu he programme kaltlanga an thil hmuh leh hriatte chu ngaipawimawha chhawr tangkai tum theuh turin a fuih a ni.
He hunah hian Pu David Lalthantluanga, Special Secretary, School Education Department chuan keynote address a nei a. SCERT Director Pi Caroline Zoramthangi, Nodal Officer, Pariksha Pe Charcha (PPC) hnen atangin PPC chungchang ngaihthlak a nih bakah kumin January ni 24-28 inkara New Delhi-a PPC chungchang inzirtirna buatsaiha Mizoram aiawha tel Lalhriathlui, Class 12, St. Paul's HSS hnen atangin a tawnhriatte ngaihthlak a ni a. Hemi hnu hian Prime Minister leh Zirlaite inkawmhona thlirho niin, Pu C.Lalthanzira, State Project Director, Samagra Shiksha, Mizoramin lawmthu sawiin hun hman a khar a ni.
 |  |  |
  |   |  |
