SCHOOL EDUCATION MINISTER IN SCERT A TLAWH
School Education Minister, Pu Lalchhandama Ralte chuan Dt. 16 April, 2019 hian SCERT Office tlawhin an hnathawh hrang hrang te a enpui a. Office chhunga Computer Laboratory te, Language Laboratory te, EDUSAT (Educational Satellite) Hub leh Studio bakah B.Ed (Special Education) Classroom te a fang kual a ni. School Education Minister hi Aizawl North-III bialtu MLA, Pu C. Lalmuanpuia leh Lengteng bialtu MLA, Pu L. Thangmawia ten an tawiawm bawk.
He hunah hian SCERT Auditorium-ah inkawm khawmna hun hman a ni a, SCERT officer leh staff te bakah DIET, Aizawl a thawktute an tel tha hle. He programme hi Pi Esther Lal Ruatkimi, Commissioner & Secretary, School Education in a kaihruai a, Pi Laldawngliani Chawngthu, Director, SCERT chuan Minister te lawmna thu (Welcome Speech) sawiin SCERT hnathawh tlangpuite a sawifiah a ni.
School Education Minister, Pu Lalchhandama Ralte chuan thusawiin SCERT Office chu a faiin, inrelbawlna fel fai tak a awm tih a lan avangin lawmawm a tih thu a sawi a. Zirna lama Mizoram in hmasawnna tluantling a neih theih nan SCERT chu textbook duangtute an nih angin nasa taka tan la turin a fuih a, Mizo nihna rilru vawng nung thei tura zirlaibute buatsaih a pawimawh hle a ni a ti. Education hnuaia thawktute chu inthlahdah a rem lo tih sawiin, kan naupangte a nghawng a, chu chuan kan hmalam hun zawng zawng a nghawng avangin SCERT leh DIET a thawktute chu missionary rilru pu a thahnemngai taka thawk turin a fuih. School Education Minister a nih anga biak a ngaihna apianga a laka inthlahrung lo turin a chah bawka, a theihtawp a tangkai tura zirna hmasawn nana a inpek thu a sawi.
Pu C. Lalmuanpuia, MLA chuan, SEDP buatsaih anih laia SCERT an dah pawimawh dan te a sawi a, Mizoram a zirna hian rampum huap zirna (National Standard) a phak theihna tura SCERT hnathawkte pawimawhna sawiin, khawvel tukverha dak pha thei tura zirlaite hruai thei tura tan la turin a fuih.
Pu L. Thangmawia, MLA pawhin SCERT chu Research Journal tha tak sual chhuak turin a fuih a, zirlai tam tak research bei mek te tan leh zirtirtu tha tak tak ten an thiamna an pho chhuahna tur atana platform lo buatsaih sak a tul hle niin a sawi.
He inkawm khawmna hi Pu Lalnuntluanga Hnamte, Principal-in lawmthu a sawi hnuin tihtawp a ni.
