November 22, 2025 khan School Education Minister Dr Vanlalthlana'n Government Khawrihnim Primary School Centenary lawmna neihah khuallian niin a hmanpui a, SCERT Director Pi Caroline Zoramthangi leh School Education Officer engemaw zatin an tawiawm a ni. 

Minister chuan Centenary hriatrengna lung a hawng a, he hunah hian  thusawiin Govt Khawrihnim Primary School kum za a tling ta chu a lawmpui thu a sawi a, he school atanga mi chhuanawm tak tak an chhuak chu lawmawm a tih thu a sawi.

Minister chuan kan ram zirnain hma a sawn theih nan tun session-a third term atangin zirlaiten zawhna in ang an chhang dawn a, Government, Deficit leh Adhoc Grant in aid school Class V-VIII zirlaiten an chhang dawn a, hei hian zirnaah danglamna a siam ang tih a beisei thu a sawi.

Khualzahawm Prof H.Lalthanzara Principal Pachhunga University College pawhin he hunah hian souvenir a tlangzarh a, thusawiin zirna lama tan lak a pawimawhzia leh khawtlang nu leh pate pawhin zirna boruak tha siam a ngaih thu a sawi a, he sikul hi a zir chhuahna a nih thu leh hmasawn zel tura a duhsak thu a sawi bawk.

Pi Angela Zothanpuii Director School Education Department, Pi Caroline Zoramthangi Director SCERT leh Pu C.Lalthanzira State Project Director Samagra Shiksha te pawhin Centenary lawmpuina thu an sawi bawk.

Govt. Khawrihnim Primary School hi kum 1901 khan thingtlanga school enchhin 3 zingah a tel a. Kum 1925 atangin chhum lo chat lova kalpui a ni a, Headmaster hmasa ber chu Pu Chalsuakpuia a ni a, tun thlenga he sikula thawk tawh te chu zirtirtu 17 an ni a, kumin hian zirlai 51 an awm mek a ni.