Dated 10th April, 2026 khan Mizoram State Council of Educational Research & Training (SCERT) Science Promotion Wing (SPW)-in kum tin an buatsaih ṭhin Rajya Stariya Bal Vaigyanik Pradarshani (State Level Student Science, Mathematics and Environment Exhibition tih ṭhin) chu May 7–8, 2026 khian Government High School, Lungleiah buatsaih leh tum a ni a. Hemi atana inpuahchah nan hianApril ni 10, 2026 khan Lunglei Municipal Council (LMC) huam chhunga High School (HS) Headmaster leh Science subject nei Higher Secondary School (HSS) Principal te nen Lunglei Education Complex-ah thil pawimawh hrang hrang sawi ho a ni.
SCERT Deputy Director (SPW) Pu F. Lalliansanga chuan hun kaihruaiin, Science Exhibition kalpui a lo nih tawh dan te a sawi fiah a. Science exhibition-in naupangte thiamna tak tak a pek dan te sawiin, he programme hi National Education Policy (NEP) 2020 nena inhne rem thei ang bera kalpui a nih thu a sawi.
Lunglei District Education Officer & District Project Coordinator Pu Micky R. Lalenkawla chuan Lungleiah zirlaite hmasawnna atana hun ṭha leh remchang Science Exhibition buatsaih a ni tur chu lawmawm a tih thu sawiin, zirtirtute chu a ṭha thei ang bera ṭawiawm leh thawhpui tur te, science exhibition-ah hian an zirlaite telpui ṭheuh tur te'n a chah.
He hunah hian State Level Science Exhibition buatsaihna tur leh a hlawhtlinna tura ṭul leh pawimawh hrang hrangte sawi ho a ni a. Exhibition thupui atan hian "STEM for Viksit and Atmanirbhar Bharat" tih chu hman a ni dawn a. State Level-a ti ṭhate hi National Science Exhibition-ah Mizoram ai awhin an tel leh ang.
Exhibition neih chhung hian "Reducing Plastic Pollution" (Plastic Bawlhhlawh Tihtlem) tih thupui hmangin Sciene tihlar dan tur zir hona, "One Day Seminar for Popularisation of Science" buatsaih a ni bawk ang.
