Zirtirtu nih hi thil nuam leh hlimawm tak mai a ni a, naupang  duhawm tak  tak lo zirtir hi a nuam hle a ni.  Naupangten kawng dik tak an zawh theihna tur leh nun kawng tha leh dik an neih theihna tura kawhhmuh hi  Zirtirtute mawhphurhna lian tak a ni.

            Kawng leh lamah erawh chuan Zirtirtu nih hi hrehawm tak a ni a. H/S leh HSS Zirtirtute tan phei chuan naupang , an tleirawl lai, an luhlul ve lai tak han zirtir hi thil hahthlak  leh hrehawm tak a ni ve bawk.Naupang thiamthei leh  thuawih takte zirtir an nawm hle laiin, thiam thei lo   leh zir tha duh lo zirtir hi a hahthlak hle bawk a ni.Engpawh nise, kan zirlaite an hunkal zel a hlawhtling tak tak han hmuh hi a nuam tak zet a ni.

            Kum 20 chuang lai mai zirtir hna han thawh takah chuan thil chi hrang hrang tawn pawh a tam thei ve viau mai.  Chung zinga ka hriat reng chu  sawi ka han tum  ang e. Vawi khat chu Cl – IX ah hian class ka la a, kan topic chu Thlai te monocotyledon leh Dicotyledon a thliar hran dan a ni. Thlai te hi an kung, zung, hnah leh par atangin eng zawk nge an nih hi a hriat theih a. Chumi chu hriat tawh chuan an thliar hran zung zung theih a ni. Naupangte chu a thu ka han zirtir phawt a, chumizawhah chuan paper pein chart/table ziah tir an ni a. Kan school compound a thlai chi hrang hrangte  chu monocotyledon nge an nih dicotyledon  thliar hrang turin hna pek an ni ta a.Classroom atanga chhuak in school compound zau nuam tak,  thlai chi hrang hrang  awmnaah chuan an kal ta sang sang mai a. A hrethiam sa te chuan thlai te chu ngun taka enin an kung, hnah awm dan, leh a  par   atang te chuan engzawknge an nih tih hmuchhuakin hlim takin an paper ken a chart/ table ah chuan an ziak lut mawlh mawlh   a. Chutih laiin a la hrethiam ve lo engemawzat chuan zirtirtu rawn zawt lehin an rawn kal leh a. 

            A tira hrethiam lo ho pawn an han hriatthiam tawh chuan nuam an ti em em mai a, thlai chi hrang hrang bulah kal kualin an tihtur chu an ti ta zung zung mai a ni. Ruah a lo sur ta a le, rawn lut tawh rawh u   tih pawhin  an la rawn lut duh mang lo a, an la tlan kual  zawr zawr a ni.He mi ni hian Learning by doing tih chu atak ngeiin kan hmu a. An sawi 'I hear and I forget, I see and I remember, I do and  I understand' dik zia a tak ngeiin kan proved a ni. He mi nia kan thil zir hi naupangte hian   an theihnghilh theih  ka ring tawh lo. Kei a zirtirtu ngei pawh hian ka chian phah em em a ni.

            Zirtirtute hi mi nun chher tu pawimawh tak kan ni a, taimaknate,  dawhtheihna te,  in zir thar rengte hi kan mamawh hle a. Training tha tak tak kan dawn thinte hi a taka kan zawm a pawimawh tak zet a ni.

            Ka lawm e.

Submitted by

K. Vanlalnghaki

Teacher

Govt. Bethlelem Vengthlang  H/S

Aizawl District

Ph - 9862377017