Kum khat lai chu Mathematics ka zirtir ve tawh. Lehkha ka zir san leh nual hnuin Skul pakhatah pui zawk turin ka kal. Pawl kua-ah zirtir tur a ni. Zirlaibu thar zir kum a ni a, ka inringtawk ve tho mai. Zirlaibu pawh keu lawk hauh lovin Class lam ka pan. An zir hmabak ka zawt a, Logarithm a lo ni. Ka thiam ve viau thin kha maw…
Black-Board fai hen hawnah chuan ka chawk tan ta. Annin uluk takin an lo ziak chhawng ve zel a, keiin Formula hman dante ka sawifiah zel a, an ngaithla tha khawp mai. Formula dangah ka pakai zel a, a thui ta hle mai. Ka ziak khat ta vek a, nawt rehin ka chhunzawm zel. A dikna a chhuak mai thei lo!
Ka chawh tawh chu ka’n ennawn thin a, dik lo a awm lo. Mahse a sei lutuk tawh. Naupangin uluk takin an ziak chhawng zel si… Naupang hriat lohin kawchhung a lum tan. Naupang hnung lamah ka va phei thauh thauh a, uluk taka a hnung ber atanga va thlir pawhin a dik thlap, ka hawrawp pawh a chhe lo. Mahse a thui lutuk a ni!
Naupangin min ring em em a, mahse keimah lamah inrinhlelhna thlipui a thaw mek a ni. Khua a lum ta thut a, thawk a rang a, thlan a tla tan. Thing lu bula Zawng dan ang mai ka ni tawh. Tu phiangsenin nge Logarithm hi lo hmuchuak? Lu a hai hmaa tihtawp dan ngaihtuah a ngai. Peon pawhin dar a khawng har lutuk.
“Nakinah kan la chhunzawm leh ang” tih leh dar rik ruala chhuah ka rual. Inringtawk taka pen lut thauh thauh kha rukru man thelh ang maiin ka put chhuak zal zal mai a ni.
-----------
K.C. Lalduhawma
Teacher
Govt.P.M. High School
Lungdai , Kolasib District
Ph. - 9436780102
