4th December, 2024 khan India ram pumah Ministry of Education hmalakna in Educational Achievement Survey lian tham, tunhma lama National Achievement Survey tih thin, tuna PARAKH Rashtriya Sarvekshan (PRS) 2024 tih tak chu Mizorama School thlanbik 1058 ah pawl 3, pawl 6 leh pawl 9 zirlai te tan neih a ni. He survey hi Dr. Vanlalthlana, School Education Minister chuan a ngai pawimawh hle a, survey neihna school pakhat Rosebud school a tlawh a, hetah hian Pi Caroline Zoramthangi, Director SCERT, Pi Angela Zothanpuii, Director School Education leh Pu R Lalbiakzauva, DEO Aizawl in an tawiawm a ni.
Dr. Vanlalthlana hian a bial chhunga school dangte Govt. EM P/S, Ramhlun Sports Complex leh Govt. P/S Ramhlun Vengthar te chu a tlawh bawk a. An hmunhmate enfel puiin an harsatna leh mamawhte Headmaster leh zirtirtute a sawipui.
PARAKH Rashtriya Sarvekshan 2024 hi Ministry of Education hian India ram pumpui huapa zirna in hma a sawn theihna tura a hmalakna chi khat niin ram chhunga zirlaiten an thiam chhuah tura duante an zir chhuak em tih enna tura buatsaih a ni. National Education Policy (NEP) 2020-in school stage chi hrang hrang a sawi Foundational, Preparatory leh Middle Stage tawpna theuh a zirlaiten an thiam tura bituk an thiam leh thiam loh enna tur niin Language, Mathematics, Science, Social Science-ah leh The World Around Us subject-ah te naupangten zawhna an chhang a ni. Ministry of Education duan danin zawhna te hi PARAKH, NCERT in state tina SCERT te nena an siam niin survey conduct hi CBSE kuta dah a ni. Mizorama survey neih hi District tina DIET Principal-te leh District Project Officer-ten anmahni district theuh ah an buaipui a. He survey hi NEP 2020 ina zirna atana a tum bulpuite ngaihpawimawh a nih dan te, zirnaa kan hnufualna te, zirna huapzo (inclusive education) kalpui a nih dan te bakah education policy duangtute'n quality education atana policy tha tak an duan chhuah theihna tura an hriat tur pawimawhte he survey hian a hrin chhuah beisei a ni.
PARAKH chuan National Level Observer atan Prof Lallianzuali Fanai, Principal IASE Mizoram chu a ruat a. Tehna chi hrang hrang hmangin Mizorama PRS 2024 hi felfai taka kalpui ani em tih a enfiah ani. National Level Observer hi Dr Lalduhawmi Thomte, Joint Director SCERT leh Pu H. Lalfakzuala Principal DIET Aizawl ten an tawiawm a. Prof Lallianzuali Fanai hian school 3 tlawhin PARAKH in tehna an duan hmangin heng school-a survey buaipuitu Observer te leh Field Investigator ten an hna an thawk tha em tih te, sample school-a zirtirtuten an school-a survey ti tura lo kal te an dawngsawng tha em tih te, naupangten an zawhna chhan te an entawn em tih bakah dik tak leh felfai takin survey hi neih a ni em tih a endik a ni.
 |  |
 |  |
