Ni 3 July, 2025 chhun dar 12:30 khan Dr. Vanlalthlana, School Education Minister chuan SCERT-ah SAKSHAM Centre a hawng. SAKSHAM hi NGO an ni a, 2003 a New Delhi-a din niin India ram chhunga rualbanlote tan nasa takin hna an lo thawk tawh a ni. An thawh that avanga rampum huap chawimawina te pawh lo dawng tawh an ni a, tum hnih lai  President’s Award pawh an lo dawng tawh bawk. Kum 21 chhung lai mai khaw hmuh lama harsatna neite (visual impairment) tan hian tangkai takin an thiamna an lo hmang tawh a ni. 

He hawnna inkhawm hi Pi Caroline Zoramthangi, Director, SCERT chuan a kaihruai a, SAKSHAM te nena thawhhona neih tur hi lawmawm a tiin, he thawh hona  avanga mitdel te tana mel lung thar phun a ni hi lawmawm a tih thu a sawi. Kum 45 vel kal ta a SCERT din tirh phat atangin disability management hi nasa taka kalpui a nih thin thu a sawi a, Sikul naupang rualban lote harsatna sut kian kawngah SCERT in hma nasa taka a lo lak tawh thin thu a sawi bawk.  IED Scheme implementation hi Samagra kutah awm tawh mah se, SCERT chuan Academic support  a la pek reng thu a sawi a. Azim Premji Foundation te nen Inclusive Curriculum chungchangah thawk hovin, kum 2004 atangin National Institute of Orthpaedically Handicapped (NIOH), tuna NILD ni ta te nen thawk ho chungin, rualban lo naupang te tan SCERT in hma nasa taka an lak thu a tarlang.

Dr. Vanlalthlana, Hon’ble Minister of School Education chu Khuallian niin SAKSHAM hmang tangkai theitu tur kan ni hi lawmawm a tih thu a sawi a. He Trust dintute hmathlir leh an thawhrimna mai bakah, SCERT hmuna Centre an rawn din avangin lawmthu a sawi bawk a ni. Minister chuan mitin thleng phak zirna tha neih hi sorkarin a tum berte zinga mi a ni a ti a, mi zawng zawng huam tak tak tur he Branch lian tak SCERT-a awm tur hi, mit lama harsatna neite khawvel nuam tak siamna kawnga hmasawnna ropui tak a ni a. He thawhhona hian zawi zawiin kan thawhrimna a tichak ang a, naupang tumah hmaih lovin, tanpuina bik, hmanraw tha leh zirtirna bik kan pek theih ngei ka beisei a ti bawk. He Branch hi zirlai mamawh hrang hrang nei zirtirtute  tan zirna hmun pawimawh tak a ni ang a, nu leh pate tan pawh thil pawimawh tak a ni ang a, hriatna leh puihna pe thei tur Branch tangkai tak a ni bawk ang a ti.

He inkhawmah hian Pi Zoramthangi Ralte, Joint Director chuan SCERT in rualbanlote tana hma a lo lak tawhna chungchang report a pe a.  

Dr. Dipendra Manocha, Honorary Founder Managing Trustee chuan SAKSHAM chungchang sawiin, mit khawhmuh lama harsatna nei ten chhungkua leh khawtlangah pangngai taka nun an hman theihna tur thlir chung leh zirna tha leh eizawnna tha an neih theihna tur hmathlir nei chungin  kum 2003 khan SAKSHAM Trust chu din anih thu a sawi. Technology leh Skill development hmanga harsatna tamtak sutkian anih thu sawiin, naupan tet atanga mitdel ani chungin, dictionary leh newspaper a chhiar theih tawh thu te, midang tihbuai ngai lova textbook a chhiar theih thu leh exam a hmachhawn theih thu a sawi bawk.  ‘Kan mission chu, mitdel leh khawhmuh lama harsatna neite’n tunlaia an tih theih loh thil an tih theih nana technology thar siam chhuah a ni a ti. ‘Tuna telephone, smartphone leh computer atan a screen reading software kan neih mek ah hian Mizo tawng a la tello a, reilo te ah Mizo tawng a rawn tel tawh ang tih hi ka tiam a che u’ tiin a thusawi a khar a ni.