Vawiin December 11, 2024 khan SCERT chuan  Poetry Festival leh Proficiency Award in English semna hun an hmang a. He programme hi kum 2011 atang khan kum tina neih thin niin, zirlaite tan thupui neia poem in phuahsiakna, ‘On the Spot Poetry Writing Competition’ hman thin a ni. HSLC leh HSSLC-a English subject-a ti tha te lawmpuina  certificate leh cash award sem thin a ni bawk. 

He Poetry Festival-ah hian Pu JH Zoremthanga, Chairman, MBSE chu Khuallian niin, Pi Angela Zothanpuii MCS, Director, School Education chu Khualzahawm a ni bawk. He programme hi Pi Caroline Zoramthangi, Director, SCERT-in a kaihruai a, Dr. Lalduhawmi Thomte, Joint Director, SCERT chuan Keynote address sawiin, Poetry Festival leh Proficiency Award in English hi kum 2011 atang khan kumtin neih thin a ni tih thu a sawi a. Kum 2011 atanga kumin 2024 thlengin zirlai 393-in Proficiency Award in English lawmman hi an dawng tawh a. He lawman hian certificate leh pawisa fai a keng tel a ni. Kumin hian Poetry Festival-a tel turin Higher Secondary School 23 atangin zirlaite sawm an ni a, zirlai 60 an rawn tel a, kumin atana thupui (theme) chu ‘Undo…what if’ tih a ni.

Khual zahawm Pi Angela Zothanpuii, MCS chuan thusawiin SCERT-in he programme a lo buatsaih hi lawmawm a ti a, Mizo thalaite zingah Mizo tawng thiam lo tawk leka Sap tawng thiam kan tam hi pawi a tih thu a sawi a, language proficiency hian mahni inrintawkna min pein, hnamdang te nena thawhhona leh hna dilna atan te saptawng kan hmang tangkai tur a ni a ti. Mizo naupangte hi kan duai lo a, talent tha tak tak an nei tih a lang a, an talent haichhuaktu SCERT chungah lawmthu a sawi a ni. Khual zahawm hian Proficiency Award in English a sem nghal a. He award hi HSSLC-a ti tha zirlai 20 hnenah leh HSLC-a tithe zirlai 4 hnenah hlan a ni bawk. 

Khuallian Pu JH Zoremthanga, Chairman, MBSE-in thusawiin. Khuallian chuan SCERT-in hmathlir thui tak neia hetiang programme an buatsaih hi lawmawm a tih thu a sawi a. Mizo history leh khawvel history kan en chuan thu leh hla (literature) hian nasa takin thil a tithei tih kan hmu a. Kan pi leh pute pawh kha hmanlaiin hla thu tawite vangin chhim leh hmar an lo indo phah hial a, hei hian thu leh hla pawimawh zia a tilang chiang hle a. Thalaite chu poem ziah uar sauh sauh tur leh hetiang lama hmasawn zel turin fuihna thu a sawi bawk.  A thusawi zawh hian Poetry Writing Competition-a a ti tha thlanchhuah te hnenah lawmman  a sem  bawk. 

Poem inphuahsiakalawmman la te chu –

  1. Ruthi Lalrinpuii, Class XII(SC), St. Paul’s HSS
  2. Emmanuel Vanrempuia, Class XII (Arts), St. Paul’s HSS 
  3. Jason Lalngaihsaka, Class XII (Arts), Govt. Mizo HSS  

Poem inziahsiak-a endiktute chu –

  1. Dr. V.L. Rinawmi, Asst. Professor Deptt. of English, Govt. Johnson College
  2. Dr. Lalbiakdiki Chawngthu, Asst. Professor Deptt. of English, Mizoram Christian College
  3. Pu Mark V. Vanlalrema, Asst. Professor Deptt. of English, Govt. Aizawl College 

Poetry Festival leh Proficiency Award semna hi Pi Lalnunsiami, Deputy Director, SCERT-in lawmthu sawina neiin hun a khar a ni.