Vawiin ni 20.8.2025 (Nilaini) hian SCERT Seminar Hall-ah Dr. Vanlalthlana, School Education Minister hovin Rev. Dr. K.Thanzauva Education Consultant, Pu David Lalthantluanga IAS, Special Secretary, School Education Department, Pu R. Lalbiakzuala Additional Secretary School Education Department bakah SCERT- a Senior officer-te, Director of School Education leh State Project Director, Samagra Shikha tena Academic Session2025-26 chhunga Common Question exam kalpui dan tur chungchang an rel a. He meeting hian Mizoram chhunga Government leh Govt. Aided (deficit, adhoc, lumpsum etc.) school zawng zawngah Standardized Assessment hmanga exam buatsaih turin thu an rel. He exam hian Autonomous district council huam chhunga school-te leh private school-te a huam lovang. 


School Education Minister hova thukhawm chuan he Common question Exam hi a hming atan Standardized Assessment for Elementary Schools (SAfES) nise a ti a, hei hi Mizoram chhunga elementary school ten standard inang tlanga zawhna leh chhanna, NCF-FS leh NCF-SE in a sawite mumal taka an hmelhriat nana duan a ni.


SAfES exam-ah hian Mizoram chhunga Pawl – 5 leh Pawl – 8 zirlai naupangten final exam atan subject tinah zawhna inang (Common question) an chhang anga, zawhna hi SCERT-in term tin atana portion a siam atangin an textbook-a third term portion tur bik atangin a siam ang.


Heng bakah hian NEP 2020-in academic structure a ruahman dan zawm nan te, school zawng zawngin Academic Authority, SCERT in zirlaibu zirtur a siam chu an zir ngei em tih hriat nan te, zawhna quality tha leh pattern inang an chhan tlan theih nan te leh zirtirtuten Lesson Plan an siamsa mumal takin an kalpui em tih hriatchian nan tea tiha ni. 


Academic Session kal lai mek 2025-26 hi chu Pilot Project anga kalpui tur a nih avangin 3rdterm-ah tan a ni ang. Academic session tharah erawh chuan term tina exam tawh tura ruahman a ni a, tin he exam-in a huam tur chin school leh pawl zat te chu la ngaihtuah that tura rel a ni.