Ni 25.6.2025 (Nilaini) khan SCERT, Mizoram chuan INSPIRE MANAK hnuaiah State Level Exhibition and Project Competition a buatsaih. He programme hawnna inkhawm hi Pi Zoramthangi Ralte, Joint Director, SCERT in a kaihruai a. Pi Caroline Zoramthangi, Director SCERT chu khuallian niin he programme hi a hmanpui. Director chuan thu sawiin, India ram pum aṭanga INSPIRE MANAK diltu naupang maktaduai khat (One Million) zing aṭanga thlanchhuah naupang 7 (pasarih)te chu a chhuan thu a sawi a. Naupangte hmasawna leh talent haichhuahna tura central scheme SCERT in a kalpui thei chu lawmawm a tih thu sawiin, ram hmasawn nan science thiamna pawimawh zia kal khawmte hmaah a sawi. 

            Pu F Lalliansanga, Deputy Director, SCERT & State Nodal Officer (INSPIRE MANAK) chuan report pein, INSPIRE scheme hi Department of Science & Technology, Government of India Flagship Programme pawimawh tak, National Innovation Foundation (NIF) leh SCERT te ṭangkawpin a buatsaih a nih thu a sawi a. Kum 2010 atanga kalpui anih atangin, mizo naupang 3551-in he award hi an dawng tawh a, award hian ₹10000 (Singkhat) a ken tel thu a sawi bawk.

            Awardee 7 (Pasarih) atang hian National Level Exhibition & Project Competition (NLEPC) a tel tur 5 (panga) thlanchhuah an ni a, heng thlang chhuak tur leh thurawn (mentor) pe tur hian mithiam ruat an ni, chungte chu:

1.         PC Lalngilneia, Sr Scientific Officer, MISTIC, Dept of Science & Technology 

2.         Dr. H. Lalhmingsanga, Asso. Prof., Dept. of Mechanical Engineer, NIT Mizoram

3. ⁠        PC Lalrintluanga, Sc Consultant, SCERT

            Endikna atan hian tehfung awm sa pawimawh tak tak hman a ni a, chungte chu - Degree of Novelty, Solving Existing Problem, Social Applicability, Scope of Diffusion leh Relevance in Current Govt. Schemes te an ni. Heng te hi NLEPC a tel tura thlanchhuahte chu an ni:

Sl. No

NAME

SCHOOL

PROJECT TITLE

1

RUTH ROLUAHPUII

St. Pauls HSS, Aizawl

THE SMART FLOOR MOP

2

PAUL K LALHRUAITLUANGA

Bethel Mission School, Champhai

SOLAR VEGETABLE DEHYDRATOR

3

LALRUATFELA

Govt. Vengthlang MS, Champhai

WOOD SAWING MACHINE

4

NATHAN LALROHLUA

Don Bosco School Lawngtlai

ATTACHMENT TO THE PAINT ROLLER

5

REMPUI H ALZAM

Don Bosco School Lawngtlai

ROTATING CEILING CLEANER

            Pu R. Lalbikzuala, Junior Associate, NIF chuan naupang thlanchhuahte hnenah NLEPC chungchanga hriattur pawimawh leh form fill up tur pawimawhte hrilhhriatna hun a hmanpui bawk a ni. 

Naupang thlanchhuahte hi Department of Science & Technology (DST), Govt. of India in 13th NLPC neih hun tur a tifel hunah Mizoram aiawhin an tel ang. A kalna senso zawng zawng pawh hi DST hian a tum leh vek dawn a ni. SCERT chuan Young Scientist & Innovators te an kal zelna turah duh sakna a hlan a ni.