SCERT, Mizoram chuan ni 8 – 9 April 2025 chhung hian INSPIRE Awards MANAK dawngtute tan State Level Exhibition and Project Competition & Mentoring Workshop chu Conference Hall, SCERT-ah a buatsaih a. Hetah hian zirlai award dawngtu naupang panga (5) Hmangaihsangi, Class- VIII, Neuhof English Medium School, Chanmari, Aizawl, Timothy Vanlalhmangaihsanga, Class VIII, St. Maria M/S, Kolasib District, Miriam Lalduhawmi Class IX, Lal Thanhawla High School, Serkhan, Kolasib District, Lalrinmawia Class IX, Lal Thanhawla High School, Serkhan, Kolasib District leh Joel Lalruatkima Mualchin, Class VI, Don Bosco School, Lawngtlai District ten an model siam an entir. Heng Awardees te hi National Level Exhibition and Project Competition, New Delhi a neih turah an tel dawn a ni.
INSPIRE Awards MANAK atan hian SCERT, Mizoram hi State Nodal Office niin, kum 2010 atang khan he scheme hi a lo buaipui tawhin, pawl 6 atanga pawl 10 zirlai naupang zawng zawng tan online a dil theiha ni a, he AWARD hian Certificate leh Rs. 10000 (Cheng singkhat) a keng a ni.
He exhibition-ah hian zirlai naupangte'n an suangtuahna hmanga Science & Technology hman ṭangkai theih dan turte duang chhuakin, a lem (model) an siam chhuak a, Exhibition-ah an rawn pho chhuak thin a ni. Awardee te hian National Level-a an tih that dan azirin SAKURA Programme Japan ramah an tel leh thin a, Mizo naupangte pawh an lo tel tawh a ni.
He State Level Exhibition and Project Competition & Mentoring Workshop kharna programme hi Pi Zoramthangi Ralte, Joint Director, SCERT in a kaihruai a, Pi Caroline Zoramthangi, Director, SCERT chu khual lian niin, National Level intihsiakna a tel thei zirlai naupang kan neihte a chhuan thu a sawi a, ram pum huap a lang pha ngei turin a fuih. Zirlaite thil siam tih hmasawnna tur kawhhmuh turin mithiam tak tak mentor atan hian hman an ni bawk. Chungte chu Pu PC Lalrintluanga, Science Consultant, SCERT, Pu P.C. Lalngilneia, MISTIC, Dr H. Lalhmingsanga, Associate Prof. , NIT, Mizoram te an ni.
 |  |
 |  |
