Ni 12.2.2026 Education Minister Dr Vanlalthlana hoin Education Department officer-te chuan review meeting an nei a, zirtirtute zingah marksheet leh certificate nei felfai lo an awm thu report a ni a, hengte hi chhui zuia a tul anga action lak tura tih a ni. Education Minister chuan review meeting neih thin chu a tangkai thu leh thutlukna siam nan a that thu a sawi a, Officer-te chu kawng hrang hranga tan la turin a fuih.
VSK leh Google Map pawimawhna sawiin Dr Vanlalthlana chuan, "School-a thawkten Vidya Samiksha Kendra (VSK) a attendance pek that a ngai. Online-ah hnathawh hi hmuh theihin awm se, a duh apiangin an lo hmu thei dawn a, hnathawh tha lo a veng dawn a ni. VSK hmang hian kan hnathawh theih chin hi nawr san theih a ni," tiin Google map update lote chu an grant dawn turte hmundanga pek leh mai thlenga hmalak a tul thu a sawi.
Meeting-ah hian Zirlaibu thar buatsaih a nih dan te leh zirlaibu thar chu tuna hman lai nen a danglam dawn thu te tarlan a ni a, naupangte chu by heart ringawt lova, chik zawka zirtir dan turte, milem te, drama leh field trip a tam thu te, naupangte chu an tawn hriat hmangte leh zawhna zawt thiam tura chher tum a nih dan te sawilan a ni. Class V & VIII ten tun promotion exam atang hian zawhna in ang an chhan dawn thu te leh school 770 ah he zawhna thar hi an exam dawn thu te leh result hi SCERT ah lakkhawm a nih tur thute sawilan a ni.
